Hewlêr (Rûdaw) - Ajansa Madeyên Hişbir a Yekîtiya Ewropayê (EUDA) raporeke nû amade kir.
Ajans dibêje ku niha corên madeyên hişbir gelekî zêde bûne û her ku diçe diguherin.
Li gorî raporê, li Ewropayê di salekê de 7 hezar û 600 kes ji ber bikaranîna zêde ya madeyên hişbir mirine.
Berpirsê Yekîtiya Ewropayê Magnus Brunner li Brukselê rapor da nasîn û got ku ev mirin nîşan didin bê ma madeyên hişbir çi zerera zêde didin mirovan.
Her wiha hat gotin ku niha dîtin û kirîna van madeyan gelekî hêsan bûye.
Madeyên nû û xeter
Birêvebira Ajansê Lorraine Nolanê diyar kir ku bazara madeyên hişbir gelekî bilez diguhere û got:
"Kesên madeyên hişbir bi kar tînin, gelek caran nizanin ku madeyên pir xurt dikirin."
Di raporê de hatiye destnîşankirin ku hema bêje her hefte madeyeke nû ya kîmyewî derdikeve û madeyên nû bandoreke xerab li hiş, mîzac û tevgerên mirovan dikin.
Ciwan di bin rîskê de ne
Ajansê hişyarî da ku metirsiyeke pir li ser ciwanan heye çimkî hilberîner êdî madeyên kîmyewî dixin nav esrarê (heşîş) û her wiha di nav cixareyên elektronîk û xurekan de jî bi kar tînin û bi vî rengî dixwazin ciwanên nû bixin xefika xwe.
Kokaîn hêsantir tê dîtin
Divê were gotin ku li Ewropayê bikaranîna kokaînê hîn di asteke bilind de ye. Sala borî nêzîkî 4 milyon û 300 hezar kesan kokaîn bi kar aniye.
Magnus Brunner jî bal kişand ser vê yekê û biland, "Gihiştina kokaînê îro ji her demê hêsantir e."
Li aliyê din, qaçaxçî jî rêyên xwe diguherînin. Ew êdî ne tenê benderên mezin, benderên biçûk jî bi kar tînin.
Her wiha bi alîkariya botên bilez û dronan, li ser deryayê madeyan radestî hev dikin.
Her çi qasî polîsan sala borî 330 ton kokaîn girtibe jî tê gotin ku qaçaxçîtî hîn jî berdewam dike.