Hewlêr (Rûdaw) - Lîstikvanê tîma neteweyî ya Portugalê Bernardo Silva peymana du salî li gel tîma Real Madridê îmze kir.
Tîma navdar a Spanyayê îro ev nûçe bi fermî ragihand.
Silvayê 31 salî piştî 9 salên tijî serkeftin ji Manchester Cityyê veqetiya.
Peymana wî ya li gel tîma Îngilistanê dawiya sezona borî bi dawî bûbû.
Real Madridê li ser lihevkirina bi Bernardo Silva re daxuyaniyek belav kir û got:
"Real Madrid C.F. û Bernardo Silva gihîştin lihevkirinekê da ku ew di her du sezonên bê de, heta 30ê Hezîrana 2028an bibe lîstikvanê Real Madridê."
Li Kupaya Cîhanê ye
Silva heta niha 109 caran di tîma neteweyî ya Portugalê de lîstiye û niha ji cara sêyem di Kupaya Cîhanê de ye.
Tîma Portugalê dê îro derengiya şevê li Houstonê di maça Koma Kyê de li hemberî Komara Demokratîk a Kongoyê derkeve qadê û Bernardo Silva jî dê di nav kadroyê de be.
Serpêhatiya li Manchester Cityê
Bernardo Silva ji 2017an ve dema ku ji Monacoyê derbasî Manchester Cityê bû, 459 maç lîstin û 76 gol avêtin.
Ew li Monacoyê li gel kaptanê niha yê Fransayê û lîstikvanê Real Madridê Kylian Mbappe lîstibû û bi hev re şampiyoniya Ligue 1ê bi dest xistibû.
Silva li gel Cityê 20 kupayên mezin bi dest xistin.
Di nav wan de, Silva bi Manchester Cityê re di navbera salên 2021-2024an de 4 caran li pey hev û bi giştî 6 caran di Premier Leagueyê de bûye şampiyon.
Ew her wiha bû beşek ji wê tîma ku sala 2023yan Lîga Şampiyonan û sê kupabirin mala xwe, û tîma 2019an ku sê kupayên navxweyî qezenc kiribû.
Li Real Madrîdê nû
Lê belê ji bo Real Madridê rewş di demên dawî de cuda bû.
Sezona borî, wê lîg 8 puanan li paş şampiyona La Ligayê Barcelonayê qedand û di çaryeka fînalê ya Lîga Şampiyonan de têk çûbû.
Piştî ku du sezonan li pey hev ti kupayên mezin bi dest nexistin, serokê nû yê ku ji nû ve hat hilbijartin Florentino Perez, di destpêka meha Hezîranê de Jose Mourinho wekî rahêner destnîşan kir.
Real Madridê roja duşemê lîstikvanê defansê yê çepê yê Spanyayê Marc Cucurella ji tîma Chelsea bi 55 milyon euroyan veguhast tîma xwe.
Tîma Spanyayê her wiha xwe amade dike ku lîstikvanê Liverpoolê Ibrahima Konate piştî xelasbûna peymana wî bîne tîma xwe û navê lîstikvanê Interê Denzel Dumfries jî bi vê tîmê re derbas dibe.
Di heman demê de lîstikvanê defansê yê Alman Antonio Rudiger vê hefteyê peymana xwe ya li gel Real Madridê heta sala 2027an dirêj kir.