رووداو دیجیتاڵ
هێزە دەریاییەکانی ئەمریکا توانییان تیمی هێلیکۆپتەرە هێرشبەرەکەی جۆری ئاپاچی کە لەلایەن ئێرانەوە خرابووە خوارەوە، لە رێگەی بەکارهێنانی درۆنێکی دەریایی پێشکەوتووەوە بە ناوی (کۆرسێر) رزگاربکەن. ئەم ئۆپەراسیۆنە یەکەمین هەنگاوی لەم شێوازەیە تێیدا مرۆڤ و ئامێری زیرەکی سەربازی شانبەشان کاردەکەن.
رۆژی سێشەممە، 09-06-2026، گوتەبێژێکی فەرماندەیی ناوەندیی سوپای ئەمریکا (سێنتکۆم) رایگەیاند، درۆنی دەریایی (کۆرسێر)، کە بەلەمێکە و درۆنێک لێیدەخوڕێت، تیمی هێلیکۆپتەرە ئاپاچییەکەی "هەڵگرتووەتەوە و گواستوونیەتییەوە بۆ شوێنێکی دیکە لەسەر ئاوەکە، لەوێشەوە بۆ سەر هێلیکۆپتەرێکی فریاگوزاری سەرخراون." هەردوو سەربازەکە ئێستا لە دۆخێکی جێگیردان.
دۆناڵد ترەمپ، ئێرانی لە خستنەخوارەوەی هێلیکۆپتەرەکە بە بەرپرسیار زانی، کە لەلایەن کۆمپانیای بۆینگەوە دروست دەکرێت و بەڵێنی وەڵامدانەوەی سەربازیی دابوو.
درۆنی دەریایی کۆرسێر کە لە تشرینی یەکەمی 2024دا پەردەی لەسەر لادرا، درێژییەکەی 7.3 مەترە. دەتوانێت 1852 کیلۆمەتر ببڕێت، 453 کیلۆگرام بار هەڵبگرێت و خێراییەکەی بگاتە زیاتر لە 64 کیلۆمەتر لە کاژێرێکدا.
ئەم بەلەمە زۆر گەورەترە لە دوو بەلەمی پێشووی کۆمپانیای سارۆنیک، کە ناویان (سپایگلاس) و (کەتلاس) بوو.
ئەم درۆنە دەریاییە لەلایەن هێزی ئەرکی 59ـی سەر بە هێزی دەریایی ئەمریکاوە بەڕێوەدەبرا، کە لە ساڵی 2021دا دامەزراوە بۆ تاقیکردنەوەی تەکنەلۆژیای بێفڕۆکەوان و ژیریی دەستکرد لە ئۆپەراسیۆنە دەریاییەکاندا . هێزی دەریایی ئەمریکا ساڵانێکە پشتگیریی لە دروستکردنی تێکەڵەیەک لە بەلەم و کەشتیی تیمدار و بێتیم دەکات.
کۆمپانیای سارۆنیک (Saronic) کە بەلەمەکەی بەرهەمهێناوە، لە مانگی کانوونی یەکەمی رابردوودا گرێبەستێکی بە بەهای 392 ملیۆن دۆلار لەگەڵ هێزی دەریایی ئەمریکادا واژۆکردووە بۆ بەرهەمهێنانی درۆنی دەریایی.