ترەمپ هێرشەکانی ئەمشەوی بۆ سەر ئێران هەڵوەشاندەوە

رووداو دیجیتاڵ 

دۆناڵد ترەمپ، سەرۆکی ئەمریکا رایگەیاند، هێرشە سەربازییەکانی ئەمشەوی بۆ سەر ئێران هەڵوەشاندوونەتەوە، ئەوەش دوای ئەوەی گوایە دانوستاندنەکان گەیشتوونەتە بەرزترین ئاستی سەرکردایەتیی باڵای ئێران و وڵاتانی ناوچەکە و پەسند کراون.

لە پۆستێکدا لە لە تۆڕی کۆمەڵایەتیی ترووس سۆشیاڵ، ترەمپ نووسیویەتی: "لەبەر ئەوەی دانوستاندنـەکان لەگەڵ کۆماری ئیسلامیی ئێران گەیشتوونەتە بەرزترین ئاستی سەرکردایەتیی ئێران و پەسەند کراون، من وەک سەرۆکی ویلایەتە یەکگرتووەکانی ئەمریکا، هێرش و بۆردوومانە پلانبۆدانراوەکانی ئەمشەوم بۆ سەر ئێران هەڵوەشاندنەوە."

ترەمپ ئاماژە بەوە دەکات کە رێککەوتنەکە رەزامەندیی سەرجەم لایەنە پەیوەندیدارەکانی لەسەرە و دەڵێت: "دانوستاندنـەکان و خاڵەکانی کۆتایی، هەم لە رووی بیرۆکە و هەم لە رووی وردەکاریی زۆرەوە، لەلایەن سەرجەم لایەنە بەشدارەکانەوە پەسەند کراون، لەنێویاندا ئەمریکا، ئیسرائیل، سعودیە، ئیمارات، قەتەر، تورکیا، پاکستان، بەحرێن، کوێت، ئوردن، میسر و چەندانی دیکە."

سەرەڕای گەیشتن بەو رێککەوتنەی کە خۆی باسی دەکات، سەرۆکی ئەمریکا هۆشداری دا کە گەمارۆکانی سەر ئێران دەستبەجێ هەڵناگیرێن و روونیکردووەتەوە: "گەمارۆ دەریاییەکە بەتەواوی هێز و کاریگەریی خۆیەوە دەمێنێتەوە تاوەکو ئەم رێککەوتنە تەواو دەکرێت."

لە کۆتایی پەیامەکەیدا ترەمپ رایگەیاندووە کە "کات و شوێنی واژۆکردنەکە بەم زووانە رادەگەیێندرێت."