رووداو دیجیتاڵ
دادگەیەکی ئەمریکا رێگەی نەدا ناوی دۆناڵد ترەمپ، سەرۆکی ئەمریکا لەسەر باڵەخانەی هونەریی بەناوبانگی (ناوەندی کێنەدی) بمێنێتەوە و بڕیاریدا کە دەبێت ناوەکەی لێبکرێتەوە.
کێشەکە چییە؟
لەوەتەی ترەمپ بووەتەوە سەرۆکی ئەمریکا، زۆر حەز دەکات ناو و وێنەی خۆی بخاتە سەر فەرمانگە و باڵەخانە حکومییەکان، کە ئەمەش لە ئەمریکا شتێکی باو نییە.
ساڵی رابردوو، لایەنگرانی ترەمپ بڕیاریاندا ناوی ئەم ناوەندە هونەرییە بگۆڕن بۆ "ناوەندی ترەمپ کێنەدی" و ناوی ترەمپیان بە پیتي گەورە خستە سەر دیواری باڵەخانەکە. ئەم کارەش وایکرد زۆر لە هونەرمەندان تووڕە ببن و ئاهەنگەکانیان لەوێ رابگرن.
دادگە چی گوت؟
مانگی رابردوو، کریستۆفەر کووپەر، دادوەری هەرێمیی ئەمریکا بڕیاریدا کە ئەم کارە نایاساییە، چونکە تەنیا کۆنگرێس بۆی هەیە ناوی ئەو شوێنە بگۆڕێت. بۆیە 14 رۆژی مۆڵەت دا بۆ ئەوەی ناوی ترەمپ لەسەر دیوارەکە لێبکرێتەوە.
رۆژی پێنجشەممە، تیمی ترەمپ و وەزارەتی داد هەوڵیاندا بڕیارەکەی دادوەرەکە رابگرن، بەڵام رۆژی هەینی دادوەرەکە داواکارییەکەی رەتکردنەوە و گوتی، نابێت کارێکی نایاسایی بەردەوام بێت.
خەڵک دڵخۆشن
شەوی هەینی، خەڵکێکی زۆر لەبەردەم باڵەخانەکە کۆبوونەوە و بە دڵخۆشییەوە چەپڵەیان لێدەدا، چونکە کرێکارەکان ئەسکەلەیان دەبەست بۆ ئەوەی بچنە سەرەوە و ناوی ترەمپ لێبکەنەوە. هەروەها هەزاران کەسیش لەرێگەی ئینتەرنێتەوە راستەوخۆ سەیری رووداوەکەیان دەکرد.
تەنانەت ماڵپەڕی ناوەندەکە ناوی ترەمپی سڕییەوە.
کاردانەوەی ترەمپ
ترەمپ تووڕە بووە و دەڵێت ئیدی واز لەو ناوەندە دەهێنێت. دادگەکەش رێگەی نەدا بە قسەی ترەمپ ناوەندەکە بۆ ماوەی 2 ساڵ دابخرێت.
ترەمپ وێنەی خۆی لە هەموو شوێنێک دادەنێت
ترەمپ تەنیا ناوی خۆی نەخستووەتە سەر ئەم شوێنە، بەڵکو ناوی "پەیمانگەی ئاشتیی ئەمریکا"شی گۆڕیوە و بە ناوی خۆیەوە کردووە، هەروەها وێنەی خۆی بە قەبارەیەکی زۆر گەورە بەسەر باڵەخانەی وەزارەتی داد و وەزارەتی کشتوکاڵەوە هەڵواسیوە.
تەنانەت ئێستا حکومەتەکەی ترەمپ دەیەوێت وێنەی ئەو بخاتە سەر دراوی 250 دۆلاری، کە بڕیارە بۆ یادی 250 ساڵەی سەربەخۆیی ئەمریکا چاپ بکرێت.