.webp&w=3840&q=75)
Hewlêr (Rûdaw) - Ofîsa Serokwezîrê Îsraîlê ragihand ku Donald Trump di pêwendiyeke telefonî de hûrgiliyên peymana bi Îranê re ji Netanyahu re eşkere kirine.
Ofîsê her wiha destnîşan kir ku "Îsraîl ne aliyekî vê peymanê ye."
Ofîsa Serokwezîrê Îsraîlê Benjamin Netanyahu daxuyaniyek belav kir û da zanîn ku Serokê Amerîkayê Donald Trump li ser peymana ji bo destpêkirina dan û standinên di navbera Washington û Tehranê de bi Netanyahu re axiviye.
Tevî ku Îsraîl ne aliyekî vê peymanê ye jî, Netanyahu "ji bo pêbendiya Serok Trump a li ser mercên peymana dawî" spasiya wî kir.
Li gorî ofîsê, Netanyahu tekez kiriye ku divê her peymaneke ku di paşerojê de were îmzekirin, van 4 xalên sereke li xwe bigire:
1. Derxistina hemû madeyên dewlemendkirî ya ji axa Îranê.
2. Hilweşandina temam a binesaziya dewlemendkirina uranyumê.
3. Danîna sînorekî tund ji bo bernameya mûşekî ya Îranê.
4. Bidawîanîna piştgiriya Tehranê ya komên wê yên li herêmê.
Ev liv û tevgerên dîplomatîk di demekê de ne ku hewlên ji bo bidawîanîna wî şerê li herêmê gihîştine qonaxeke hestyar.
Îsraîl dixwaze bi rêya zextên Washingtonê garantî bike ku Tehran êdî nebe gefeke nukleerê û leşkerî.
Netanyahu jî çend caran hişyarî daye ku ew dê pêbendî ti peymanan nebin eger ewlehiya Îsraîlê neparêze.
Trump: Dibe ku peyman li Ewropayê were îmzekirin
Donald Trump doh li Koşka Spî li ser bidawîhatina aloziyan geşbîniya xwe anî ziman:
"Îro rojeke mezin e. Li ser bidawîanîna şerê bi Îranê re peymaneke me baş heye û em dê di demeke nêzîk de reşnivîsa dawî îmze bikin û dibe ku li Ewropayê be."
Trump her wiha diyar kir ku bazarên cîhanê û borsayê bi germî ev nûçeyê pêşwazî kiriye û petrol jî erzan bûye û ragihand, "Peyman bi vî rengî ye ku divê Îran ti carî nebe xwediyê çekên nukleerê."
Pêşxaneya aloziyê
Trump tenê çend demjimêran berê li ser tora civakî ya Truth Socialê gefên tund li Tehranê xwaribûn û ragihandibû ku eger li hev nekin, ew dê bi awayekî tund êrişî Îranê bikin û Girava Xargê kontrol bikin.
Amerîka û Îsraîlê 28ê Sibatê êrişî Îranê kiribû û Îranê jî bi mûşek û dronan bersiv dabû.
Her çend ji 8ê Nîsanê ve agirbest hatiye ragihandin jî lê car caran şer û pevçûn di navbera wan de didomin.