لە رووداوێکدا لە پڕۆژەیەکی نیشتەجێبوونی هەولێر گەنجێکی خەڵکی رۆژهەڵاتی کوردستان گیانی لەدەستدا

رووداو دیجیتاڵ

لە پڕۆژەیەکی نیشتەجێبوونی هەولێر، دوای دروستبوونی دەمەقاڵێ لەنێوان کچ و کوڕێکدا، پاسەوانێکی پڕۆژەکە هەوڵی هێورکردنەوەی دۆخەکەی داوە، بەڵام لەلایەن گەنجەکەوە بریندار کراوە، دواتر گەنجەکە "خۆی هەڵدایە خوارەوە و گیانی لەدەستداوە".

سەرچاوەیەکی باڵای ئەمنی لە هەولێر بە تۆڕی میدیایی رووداوی گوت: "گەنجەکە خەڵکی رۆژهەڵاتی کوردستانە، دوای ئەوەی پاسەوانێکی پڕۆژەکەی بە چەقۆ بریندار کردووە، خۆی هەڵداوەتە خوارەوە و گیانی لەدەستداوە".

دوو سەرچاوەی جیاواز لە پڕۆژەکە قسەیان بۆ رووداو کردووە و دەڵێن: "کوڕەکە خۆی هەڵداوەتە خوارەوە و گیانی لەدەستداوە".

رووداوەکە نزیک کاژێر 05:00ـی بەیانی بووە. بەگوتەی کارمەندانی پڕۆژەکە بۆ رووداو، "کوڕەکە خەڵکی رۆژهەڵاتی کوردستانە و بۆ سەردان چووەتە شوقەی کچەکە کە خەڵكی ئێرانە، دوای ئەوەی دەمەقاڵێیان بووە، کچەکە پاسەوانانی پڕۆژەکەی ئاگادار کردووەتەوە، پاسەوانێک چووە دۆخەکە هێور بکاتەوە، گەنجەکە پەلاماری داوە و برینداری کردووە".

بە گوتەی شایەتحاڵانی رووداوەکە، "دوای ئەوەی قۆڵ و سکی پاسەوانەکە بە چەقۆی گەنجەکە بریندار بووە، گەنجەکە لە نهۆمی نۆیەمی باڵەخانەکە کە شوقەی کچەکەی تێدا بووە خۆی هەڵداوەتە خوارەوە و دەستبەجێ گیانی لەدەستداوە".

دوو لەوانەی لەسەر رووداوەکە قسەیان بۆ رووداو کردووە دەڵێن، "دوای رووداوەکە، گەنجەکە مادەی هۆشبەر و چەقۆی لێ جێماوە و هێزە ئەمنییەکان دەستیان بەسەردا گرتووە". بەڵام سەرچاوەکەی رووداو کە ئەفسەرێکی باڵای هێزە ئەمنییەکانە، هەبوون و دەستبەسەرداگرتنی مادەی هۆشبەری رەتکردەوە.

کچەکە لەلایەن پۆلیسی هەولێرەوە لێکۆڵینەوەی لەگەڵدا دەکرێت. هەروەها پاسەوانە بریندارەکە لە نەخۆشخانە لەژێر چاودێری پزیشکیدایە.

تەرمی ئەو گەنجەی گیانی لەدەستداوە و خەڵکی رۆژهەڵاتی کوردستانە، رەوانەی دادپزیشکی هەولێر کراوە.